Rækjustofninn að koma til

Bílddælingar telja sig sjá merki þess að rækjustofninn í Arnarfirði sé að koma til eftir lélegt ástand mörg undanfarin ár. Í frétt á síðunni Arnfirðingur.is er vitnað í Björn Magnússon skipstjóra á Brynjari BA, sem landaði á dögunum með sex og hálfu tonn af Arnarfjarðarrækju. Var þetta stærsti túr skipstjórans hingað til.

Svo mikill var aflinn að öll kör í lest og á dekki voru full og varð því Björn að sigla í land með 1 tonn á síðunni. Fram kemir að alls hafi skipstjórinn ungi veitt 75 tonn enda veiði hann rækjukvóta nokkurra annarra skipstjóra í Arnarfirði. Rækjan er sögð stór og falleg.