Milljónum úthlutað úr sjóði Jóns Sigurðssonar

Úthlutað hefur verið úr sjóðnum Gjöf Jóns Sigurðssonar. Að þessu sinni voru veittar 12 viðurkenningar fyrir samtals 6,5 milljón krónur.

Hæsti styrkurinn var 700.000 krónur sem fór til Jóns M. Ásgeirssonar og Þórðar Inga Guðjónssonar fyrri verkið Frá Sýrlandi til Íslands. Arfur Tómasar postula. Tómasarguðspjall, Tómasarkver, Tómas saga postula. Aðrir styrkir voru á bilinu 200 til 600.000 krónur.

Sjóðurinn var stofnaður samkvæmt erfðaskrá Ingibjargar Einarsdóttur, ekkju Jóns Sigurðssonar, 12. desember 1879. Sjóðurinn veitti um skeið allmörgum fræði- og vísindamönnum viðurkenningu fyrir vel samin vísindarit og styrkti útgáfu þeirra.

Árið 1974 ákvað Alþingi að efla sjóðinn með ákveðnu framlagi. Skal árleg fjárveiting til sjóðsins eigi nema lægri upphæð en sem svarar árslaunum prófessors við Háskóla Íslands.

Verðlaunanefnd Gjafar Jóns Sigurðssonar er kosin af Alþingi. Í henni eiga nú sæti Árelía Eydís Guðmundsdóttir, Jón G. Friðjónsson og Ragnheiður Sigurjónsdóttir.