Siðareglur lagðar fram í borgarráði

Tillögur að siðareglum fyrir borgarfulltrúa voru lagðar fram á fundi borgarráðs í dag. Samkvæmt þeim eiga kjörnir fulltrúar að forðast hagsmunaárekstra og gæta þess að fara ekki út fyrir umboð sitt í störfum sínum og virða verkaskiptingu í stjórnkerfi Reykjavíkurborgar.

Kjörnum fulltrúum verður ekki frjálst að þiggja gjafir, fríðindi eða önnur hlunnindi frá viðskiptamönnum eða þeim, er leita eftir þjónustu Reykjavíkurborgar, ef almennt má líta á það sem endurgreiðslu fyrir greiða eða sérstaka þjónustu. Nema ef um sé að ræða óverulegar gjafir. Við mat á því hvað séu óverulegar gjafir skal horft til reglna sem borgarráð setur.

Starfshópur vann að siðareglunum og var hópurinn skipaður af borgarráði 28. ágúst í kjölfar umræðu um siðareglur borgarfulltrúa og annarra kjörinna fulltrúa. Með reglunum er ætlunin að tryggja að kjörnir fulltrúar í borgarstjórn gangi ekki annarra hagsmuna í störfum sínum en þeirra sem þeir eru kosnir til.

Þegar starfshópurinn var skipaður í ágúst lágu fyrir ýmis undirbúningsgögn og drög að siðareglum frá fyrri starfshópum. Hópurinn átti að skila niðurstöðu eigi síðar en 1. desember.

Nú hillir undir niðurstöðu málsins og hafa borgarstjórnarflokkar þær nú til umsagnar.

Dagur B. Eggertsson, oddviti Samfylkingarinnar, segir að á fundi borgarráðs hafi verið samþykkt tillaga um að hafist verða handa við skráningu siðareglna embættismanna og stjórnsýslu Reykjavíkurborgar. Lengi hafi verið ráðgert að það verkefni fylgdi í kjölfar skráningu siðareglna kjörinna fulltrúa.