Fráleitt að Þorgerður segi af sér

Sigurður Kári Kristjánsson, þingmaður Sjálfstæðisflokksins, segir fráleitt að Þorgerður Katrín Gunnarsdóttir, menntamálaráðherra, þurfi að segja sér vegna tveggja ferða hennar á Ólympíuleikana.

Sigurður gerir að umfjöllunarefni á vefsíðu sinni umræðu undanfarna daga um för Þorgerðar til Peking og þá skoðun Jóns Magnússonar, þingmanns Frjálslynda flokksins, í Kastljóssþætti í gær að Þorgerður ætti að segja af sér sem ráðherra.

Jón fór offari í umræddum þætti, að mati Sigurðar sem segir að ferð Þorgerðar hafi ekki verið heyksli. Hún hafi sótt leikana sem ráðherra menntamála í ríkisstjórn Íslands.

,,Ég er þeirrar skoðunar að eigi ráðherra íþróttamála að vera viðstaddur einhverja viðburði sem Íslendingar taka þátt í þá eru það Ólympíuleikarnir, enda eru þeir óumdeilanlega stærsti íþróttaviðburður veraldarinnar," segir Sigurður.

Sigurður segir að það sé skylda ráðherra íþróttamála á Íslandi að votta því landsliði sem nær þvílíkum árangri eins og handaboltalandsliðið náði þá virðingu sína með því að vera viðstaddur slíkan atburð og undirstrika með því þá virðingu, þakklæti og stuðning sem afreksmennirnir eiga skilið frá þjóðinni.

,,Eigi ráðherra íþróttamála ekki að vera viðstaddur stærsta íþróttaviðburð í sögu þjóðarinnar, hvaða viðburð á hann þá að sækja?"

Um för maka Þorgerðar og ráðuneytisstjóra menntamála á leikana segir Sigurður að hann hafi ekki orðið var við að Jón eða aðrir hafi gert athugasemdir við það að Dorrit Moussaieff, forsetafrú, væri með í för Ólafs Ragnars Grímssonar, forseta.

,,En ég fæ ekki séð að önnur sjónarmið ættu að gilda um maka forseta Íslands að þessu leyti og um maka annarra íslenskra ráðamanna, þar með talinn ráðherra íþróttamála í ríkisstjórn Íslands," segir Sigurður.

Pistil Sigurðar Kára er hægt að lesa hér.