Ingibjörg Sólrún í Betlehem

Ingibjörg Sólrún Gísladóttir, utanríkisráðherra og formaður Samfylkingarinnar, flutti í dag framsöguræðu sem sérstakur gestur á fundi friðarráðs kvenna í Betlehem.

Á fundinum komu ísraelskar og palestínskar konur saman til að vinna að sameiginlegum skilningi á framtíð þjóðanna tveggja og forsendum réttláts og varanlegs friðar. Þetta kemur fram í tilkynningu frá utanríkisráðuneytinu.

Friðarráðið var stofnað árið 2005 af áhrifakonum í palestínsku og ísraelsku þjóðlífi; þingmönnum, ráðherrum og forystukonum frjálsra félagasamtaka . Auk þess eru erlendar áhrifakonur heiðursfélagar, þeirra á meðal Ingibjörg Sólrún en henni var boðin þátttaka í kjölfar ferðar sinni til Mið-Austurlanda síðastliðið sumar.

Í ferð sinni hitti Ingibjörg Sólrún einnig Tzipi Livni, utanríkisráðherra Ísraels, og Riyad al-Malki, utanríkisrráðherra heimastjórnar Palestínumanna, og ræddi stöðuna í friðarviðræðunum Ísraels og Palestínu auk tvíhliða samskipta.

Þá átti Ingibjörg Sólrú fund með yfirmönnum stofnana Sameinuðu þjóðanna á Vesturbakkanum og Gaza til að kynna sér ástandið á svæðinu. Þórður Ægir Óskarsson, sem var í vor skipaður sérstakur fulltrúi gagnvart palestínskum stjórnvöldum, sat fund ráðherra með al-Maliki.