15 mánaða fangelsi fyrir lífshættulega árás

23 ára Kópavogsbúi hefur verið dæmdur í 15 mánaða fangelsi fyrir 10-11 árásina svokölluð.

Maðurinn réðst með glerflösku á öryggisvörð sem var við næturvörslu í 10-11 verslun í Bankastræti í apríl síðastliðnum.

Öryggisvörðurinn hlaut lífshættulega áverka. Hann höfuðkúpubrotnaði auk þess sem slagæð í heilahimnu fór sundur. Öryggsivörðurinn hefur verið frá vinnu síðan hann varð fyrir árásinni og enn er ekki útséð hvort hann nái sér að fullu.

Sem fyrr segir fékk árásarmaðurinn 15 mánaða fangelsisdóm. 12 mánuðir voru hins vegar skilorðsbundnir. Eftir standa því aðeins þrír mánuðir sem hann þarf að afplána. Frá þeim dragast svo 45 dagar sem árásarmaðurinns sat í gæsluvarðhaldi.

Tveir lögreglumenn sem afskipti höfðu af árásarmanninum skömmu eftir að hann sló öryggisvörðinn báru fyrir rétti að árásarmaðurinn hafi engin iðrunarmerki sýnt, heldur haft á orði að verðinum hefði verið það mátulegt að vera sleginn.

Dómur féll í málinu í þann 12. ágúst. Fyrir mistök skilaði hann sér ekki á vef dómstólanna eins og venjan er um sakamál af þessu tagi.