Formaður Vinstri grænna vill eitt ríkisfjármálaráðuneyti

Formaður Vinstri grænna vill að stofnað verði eitt öflugt ríkisfjármálaráðuneyti til að taka á efnahagsvandanum. Hann segir reikninginn fyrir stóriðjuveisluna nú berast heimilunum í landinu.

Ríkisstjórnin standi nær klæðalaus á berangri og þurfi að koma sér að verki og afstýra því að frostavetur aðgerðarleysis taki við af sumri hinnar löngu biðar.

Steingrímur flutti ræðu í Reykholti fyrir stundu á flokksráðsfundi Vinstri grænna og kynnti þar hugmyndir flokksins í tíu liðum um leiðir til að rétta íslenskt efnahagslíf úr kútnum. Vinstri grænir vilja meðal annars:

1. Styrkja gjaldeyrisforðann

2. Endurskoða lög um Seðlabankann

3. Stofna sveiflujöfnunarsjóð

4. Sameina viðskipta- og fjármálaráðuneyti í eitt ríkisfjármálaráðuneyti

5. Endurreisa Þjóðhagsstofnun

6. Örva sparnað

7. Kortleggja þróun erlendra skulda

8. Auka fjárfestingu ríkis og sveitarfélaga

9. Styrkja sveitarfélögin

10. Nýja þjóðarsátt

Steingrímur segir flesta sammála um að eitthvað þurfi að gera, vandinn blasi við en nú sé mál að koma sér að verki

„En það er vel hægt að sigla í gegnum þennan öldudal," segir Steingrímur.