Framkvæmdastjóri Arababandalagsins heimsækir Ísland

Amre Moussa, framkvæmdastjóri Arababandalagsins, kemur til Íslands í opinbera heimsókn á föstudaginn kemur, 19. september. Í tilkynningu frá utanríkisráðuneytinu kemur fram að Moussa fundi fyrst með Ingibjörgu Sólrúnu Gísladóttur utanríkisráðherra í Ráðherrabústaðnum.

„Opinn fundur, þar sem Amre Moussa fjallar um deilu Ísraels- og Palestínumanna, friðarferlið og aðkomu Arabaríkjanna hefst svo kl. 12:15 í Hátíðarsal Háskóla Íslands. Fundurinn er öllum opinn en hann fer fram á ensku. Fundarstjóri verður Þórir Guðmundsson fréttamaður," segir í tilkynningunni.

Þá mun Amre Moussa hitta meðal annara Geir H. Haarde forsætisráðherra og utanríkismálanefnd Alþingis á meðan heimsókn hans til Íslands stendur.