Biskupsstofa ætlar að fara yfir ákærur á hendur Gunnari

Biskupsstofa vill ekki að svo stöddu tjá sig um mál séra Gunnars Björnssonar en Ríkissaksóknari gaf í dag út ákærur á hendur honum vegna meintra kynferðisbrota hans gegn tveimur unglingsstúlkum.

Biskupsstofa ætlar að óska eftir ákærum saksóknara og fara yfir hana ásamt lögfræðingi eftir helgi. Að því loknu mun Biskupsstofa tjá sig um málið.

Gunnari sjálfum hefur ekki verið birt ákæran. Hann vildi ekki tjá sig um málið þegar Vísir hafði samband við hann í dag.

Alls kærðu fimm stúlkur Gunnar en mál þriggja þeirra voru látin niður falla þar sem ekki var talið líklegt að þau myndi leiða til sakfellingar.

Stúlkurnar kærðu Gunnar fyrir kynferðislega áreitni og blygðunarsemisbrot. Stúlkurnar voru sóknarbörn hans og sumar þeirra virkar í starfi kirkjunnar.

Þær voru á unglingsaldri þegar meint brot voru framin.