Sæunn vill vera ritari áfram

Sæunn Stefánsdóttir ritari Framsóknarflokksins og fyrrum þingmaður flokksins hefur ákveðið að gefa kost á sér áfram sem ritari. Hún hefur verið ritari flokksins frá árinu 2006.

,,Okkar framsóknarmanna bíður mikil vinna við endurreisn flokksins okkar og vil ég taka þátt í þeirri vinnu," segir Sæunn í tilkynningu. Hún vill leggja sitt af mörkum svo að Framsóknarflokkurinn verði það umbótaafl í íslensku samfélagi sem hún segir að það þarfnist.

Sæunn var þingmaður frá 2006 til 2007. Áður hafði hún verið aðstoðmaður Jón Kristjánssonar ráðherra. Sæunn starfar hún á skrifstofu Kristínar Ingólfsdóttur, rektor Háskóla Íslands.

Yfirlýsing Sæunnar:

Flokkar eru fyrir fólk

Framsóknarflokkurinn er 92 ára og er hann því elstur stjórnmálaflokka. Hugsjónir hans á grundvelli ungmennafélagshreyfingarinnar og samvinnuhreyfingarinnar eru í fullu gildi. Fólk vill stjórnmálaflokka með skýra stefnu og ný vinnubrögð. Við eigum að svara þessu kalli tímans. Umbrotatímar eru tímar endurmats og gefa okkur tækifæri til að móta okkur skýra framtíðarsýn. Í hvernig samfélagi viljum við búa? Ég vil leggja mitt af mörkum svo að Framsóknarflokkurinn verði það umbótaafl í íslensku samfélagi sem það þarfnast.

Ég gef kost á mér áfram sem ritari Framsóknarflokksins. Okkar framsóknarmanna bíður mikil vinna við endurreisn flokksins okkar og vil ég taka þátt í þeirri vinnu.

Framsóknarflokkurinn á þess kost að verða fyrstur stjórnmálaflokka til að endurnýja flokksforystuna við þær aðstæður sem uppi eru í samfélaginu. Hleypa að nýrri kynslóð og nýjum vinnubrögðum. Í þessari vinnu verðum við að endurskoða það sem betur hefði mátt fara og gera þau mál upp um leið og við verðum að halda fram því sem vel hefur verið gert.

Framsóknarflokkurinn hefur átt í vök að verjast. Fyrir því eru margar ástæður. Að hluta til er því um að kenna að flokkurinn hefur verið of linur í samvinnu við aðra flokka og ekki haldið nægilega fram sinni stefnu og stefnumálum. Flokkurinn með sína glæsilegu fortíð hefur á tímum hugsað og hagað sér eins og smáflokkur, ekki þorað að hugsa nægilega stórt. Ég tel líka að hluti af vanda Framsóknarflokksins sé að hann hefur ekki náð að endurnýja sig, hleypa nýrri kynslóð að ákvarðanatökunni en ég vil tryggja að svo verði nú.

Ég er þeirrar skoðunar að flokkar eigi að vera fyrir fólk. Endurnýjaður Framsóknarflokkur þarf að hugsa um fólkið og fyrirtækin í landinu - en umfram allt fólk. Fólk í fyrirrúmi.

Sæunn Stefánsdóttir, ritari Framsóknarflokksins