Margrét segir stöðuna erfiða

Margrét Sverrisdóttir varaborgarfulltrúi sagði í samtali við Stöð 2 að sú staða sem upp væri komin í borgarstjórn Reykjavíkur væri erfið. Fjöldi fólks er statt í Ráðhúsinu þessa stundina til að mótmæla nýjum meirihluta í borgarstjórn.

Margrét sagði að reiði fólks væri skiljanleg. Hún hafi þó verið búin að biðja sitt stuðningsfólk um að sýna stillingu. Margrét sagði að á tímapunkti hafi hún óttast að átök brytust út í Ráðhúsinu. Hún segist þó ekki trúa því að lögregla muni rýma Ráðhúsið.

Björn Ingi Hrafnsson, sem enn er starfandi borgarfulltrúi, sagði atburði dagsins mjög athyglisverða. Þeir sýni hitann í fólki og endurspegli það sem fram kom í skoðanakönnun Fréttablaðsins.

Enn hafa áhorfendapallar ekki verið rýmdir.