Í farbanni þar til dómur fellur vegna lögguárásar

Málið vakti mikla athygli þegar það kom upp í janúar. Þá var ráðist á fjóra óeinkennisklædda lögreglumenn sem voru við fíkniefnaeftirlit á Laugaveginum. Þar höfðu þeir afskipti af tveimur körlum og einnig konu þegar nokkrir menn komu aðvífandi í tveimur bílum og túlkaði einn árásarmannanna það svo að verið væri að ráðast á konuna.

Ráðist var á lögreglumennina og voru tveir þeirra fluttir á sjúkrahús vegna áverka, þar af annar með heilahristing. Fimm menn voru upphaflega handteknir í tengslum við málið en tveir þeirra voru ekki ákærðir.

Tveir hinna ákæru voru sýknaðir vegna þess að ekki þótti sannað að þeir hefðu ráðist á lögreglumennina. Sá þriðji var einnig sýknaður af broti gegn valdstjórninni en dæmdur í tveggja mánaða fangelsi fyrir að hafa slegið tvo lögregluþjóna í andlitið. Sá hefur sætt farbanni frá því að dómur féll í mars en ríkissaksóknari ákvað að áfrýja málinu til Hæstaréttar. Sætir maðurinn farbanni til 19. desember eða þar til dómur fellur í máli hans í Hæstarétti.