Mikilvægasta verkefnið að verja stöðu heimilanna

Landssamband íslenskra verzlunarmanna samþykkti á þingi sínu í dag ályktun þar sem lýst er yfir áhygjgum af stöðu efnahagsmála hér á landi.

„Framundan er endurskoðun kjarasamninga," segir í ályktuninni. „Í þeirri endurskoðun er það mikilvægasta verkefnið að verja stöðu heimilanna. Reynslan hefur kennt okkur að farsælla er að tryggja kaupmátt með því að ná niður verðbólgu en að hefja víxlverkun verðlags og launa. Forgagnsverkefnið er því að vinna bug á verðbólgunni."

Þá er sagt að það sé allra hagur að opinberir aðilar og seljendur vöru og þjónustu haldi aftur af verðhækkunum.

„Til lengri tíma þarf að leggja grunn að sambærilegum stöðugleika og aðrar þjóðir sem við viljum bera okkur saman við njóta. Slíkur stöðugleiki næst ekki án þess að búa við stöðuga mynt. Launafólk vill vissu fyrir því að þær fórnir sem mögulega þarf að færa nú skili sér í stöðugleika og vaxandi hagsæld þegar fram í sækir." segir að lokum.

Á þinginu var einnig kjörin ný stjórn og var Ingibjörg R. Guðmundsdóttir endurkjörin formaður sambandsins.