Flugbrautahlauparar fengu dóm fyrr í vikunni

Haukur Hilmarsson og Jason Slade sem hlupu inn á flugbrautina á Keflavíkurflugvelli í gærmorgun, og mótmæltu þannig brottflutningi Keníamannsins Paul Ramses, hlutu dóm í Héraðsdómi Suðurlands fyrr í vikunni. Dóminn fengu þeir fyrir mótmæli við Hellisheiðarvirkjun í fyrrasumar.

Héraðsdómur suðurlands dæmdi á mánudaginn níu manns sem tengjast Saving Iceland til greiðslu sektar fyrir að hafa lokað veginum að Hellisheiðarvirkjun í fyrrasumar og fyrir að hlýða ekki fyrirmælum lögreglu um að opna veginn aftur.

Jason fékk 50.000 króna sekt en hann var einnig sakfelldur fyrir að hafa klifrað upp í byggingarkrana við virkjunina í heimildarleysi. Haukur fékk hinsvegar hæstu sektina eða 100.000 krónur, hinir fengu allir 50.000 króna sekt.

Haukur og Jason voru yfirheyrðir af lögreglunni á suðurnesjum í gær vegna brota sinna á Keflavíkurflugvelli en voru fámálir. Í samtali við Vísi í gærkvöldi sagðist Haukur ekki sjá eftir neinu þar sem hann hefði veirð að reyna að bjarga lífi Paul Ramses.

Lögreglan á suðurnesjum lítur mjög alvarlegum augum á brotið sem getur varðað allt að sex ára fangelsi.