Uppskeruhátíð Grasagarðsins í dag

Árleg uppskeruhátíð verður haldin í nytjajurtagarði Grasagarðsins í Laugardal í dag milli klukkan 13 og 16. Slegið verður upp hlaðborði með fjölbreyttum og ferskum matjurtum.

Fólki gefst kostur á að fræðast um ræktun og bragða á hinum ýmsu tegundum grænmetis, kryddjurta og berja. Kartöflum verður sérstakur sómi sýndur en 250 ár eru síðan fyrst voru teknar upp kartöflur á Íslandi. Í sumar voru í ræktun fimm kartöfluyrki, þar á meðal bláar íslenskar eða blálandsdrottning, gular íslenskar og rauðar íslenskar.

Gömul kartöflugeymsla verður til sýnis en nýlega var lokið við að endurhlaða hana. Miðpunktur í hverjum matjurtagarði er safnhaugurinn en allt lífrænt efni sem til fellur fer í hauginn og þar er búin til úrvals mold sem notuð er í matjurtabeðin. Leiðbeiningar verða um jarðgerð í heimilisgörðum og til sýnis safnkassar.

Garðyrkjufræðingar Grasagarðsins taka á móti gestum og hefst fræðslan við Laugatungu. Boðið er upp á te úr piparmyntu sem ræktuð er í Grasagarðinum. Ókeypis fræðsla og allir velkomnir. Þetta kemur fram í fréttatilkynningu frá Grasagarðinum.