Litháískir fangar afplána í heimalandinu

Þrír litháískir fangar sem hlotið hafa dóma hér á landi halda til síns heima á næstunni til þess að taka út refsingu sína. Þetta er í samræmi við samkomulag sem íslensk og litháísk stjórnvöld hafa gert.

Björn Bjarnason dóms- og kirkjumálaráðherra ritaði í gær undir samstarfsáætlun með Petras Baguska, dómsmálaráðherra Litháens. Samkvæmt áætluninni munu dómsmálaráðuneyti landanna efla samstarf sitt, þar á meðal á sviði fangelsismála.

Fram kemur í tilkynningu dómsmálaráðuneytisins að fyrr á árinu hafi ráðherrarnir samið um að fangar frá Litháen í íslenskum fangelsum skyldu taka út refsingu í heimalandi sínu enda væru þeir dæmdir til nokkurra ára refsivistar.

,,Á fundi ráðherranna í gær var staðfest, að þrír fyrstu fangarnir væru á förum til Litháens, enda hefði verið gengið frá öllum nauðsynlegum formsatriðum. Að loknum fundi ráðherranna heimsótti Björn Bjarnason fangelsi fyrir síbrotamenn í Vilníus og kynnti sér aðstæður þar," segir enn fremur í tilkynningu ráðuneytisins.