Kid Rock lögsækir konu

Rokkarinn Kid Rock hefur lögsótt konu að nafni Kelly Ann Kozlowiski fyrir að kæra hann fyrir að hrinda sér í snjóskafl. Árásin á að hafa átt sér stað í síðustu viku. Kid Rock er sagður krefjast hárrar skaðabótagreiðslu vegna ærumeiðinga í hans garð.

Konan gaf lögreglu skýrslu um atvikið en þar segir hún Kid Rock hafa tekið um háls hennar og hrint sér í snjóskafl. Kid Rock neitar þessu alfarið og segir ekki hægt að færa sönnur á atvikið. Samkvæmt Kid Rock hitti hann umrædda konu og kærasta hennar á skemmtistað og fóru þau heim til hans til að hlusta á nokkur lög sem hann hafði nýverið tekið upp. Hafi konan verið óstýrilát og meðal annars látið drykki sína á rándýr upptökutæki hans. Á endanum rak Kid Rock konuna út en við það hafi hún hótað að lögsækja rokkarann. Hann kann því að svara fyrir sig, hann Kid Rock.