Grillaðir grísir í skrúðgöngu

Lechon, eða grillað svín er hátíðamatur á Filippseyjum og hátíð heilags Jóns er fagnað með skrúðgöngu safaríkra grillaðra grísa.

Svínagangan er orðin hefð hjá íbúunum 70.000 í Balayan og í dögun á hátíðardaginn eru hundruðir grísa grillaðir á teini þar til húðin er gyllt.

Þeir eru síðan skreyttir og klæddir í búninga og stillt upp fyrir utan bæjarkirkjuna á meðan messa til heiðurs heilags Jóns fer fram.

Að messu lokinni hefst trumbusláttur og grísagangan leggur af stað. Einn grís, íklæddur hatti og sólgleraugum keyrir á mótorhjóli á meðan annar situr aftan á pallbíl sem auglýsir vinsæla tegund af lechon sósu.

Vinsælust eru samt brúðhjónin, grísapar í líki brúðar og brúðguma.

Að göngunni lokinni eru grísirnir svo afklæddir, skornir og snæddir.

Filippseyingar eru frægir fyrir óvenjulegar útfærslur á trúarhátíðum. Þannig er algengt að menn láti krossfesta sig á páskum til að minnast þjáninga Jesú Krists.