Madonna þarf að fá jarðarberin sín

Madonna er ekkert feimin við að gera kröfur. Söngkonan, sem syngur á Live Earth tónleikunum í London kom skipuleggjendum á óvart með löngum lista af hlutum sem þeir þurfa að útvega henni.

Speglar í fullri lengd, sippuband, te og herbergisilmur eru meðal þess sem þarf að vera til staðar í búningsklefa stjörnunnar þegar æfingar fyrir tónleikana hefjast.

,,Hún bað um rúmlega 100 box af jarðarberjum, átta spegla í fullri lengd, sippuband, Yorkshire te, lífrænt grænt te og herbergisilm með vanillulykt." sagði innanbúðarmaður Daily Star blaðinu.

,,Þetta er mjög fyndið - en ef þetta er bara fyrir æfingarnar þá get ég ekki beðið eftir að sjá hvað gerist sjálfan tónleikadaginn." sagði heimildamaðurinn og bætti við að skipuleggjendur ættu í stökustu vandræðum með að láta öllum stjörnunum sem fram koma líða eins og þær séu merkilegasta atriðið.

Live Earth tónleikarnir í London verða haldnir á Wembley leikvangingum á laugardag. Þeir eru hluti af tónleikaröð sem ætlað er að vekja athygli á umhverfismálum. Auk Madonnu koma fram Kasabian, Beasty Boys, Corinne Bailey Rae ásamt fleirum.