Lindsay Lohan hrifin af Steed Lord

Stórstjarnan Lindsay Lohan fann síðu hinnar alíslensku sveitar Steed Lord á myspace-vefnum og varð svo hrifin af tónlist þeirra að hún hafði samband í gegnum síðuna til þess að spjalla. „Hún var með einhverja einkasíðu á myspace á þessum tíma og um 150 vini,” segir Einar Egilsson, einn af fjórum meðlimum Steed Lord og sambýlismaður Svölu Björgvinsdóttur söngkonu sveitarinnar.

Einar vill annars sem minnst gera úr atvikinu og segir hljómsveitarmeðlimi lítið hafa kippt sér upp við aðdáun söngkonunnar. „Okkur fannst þetta eiginlega bara fyndið. Það er verið að spila okkur töluvert í klúbbum úti, t.d. í LA, Miami, Atlanta og víðar. Ég veit að vinur Lindsay, plötusnúðurinn Steve Aoki, þekkir tónlistina okkar. Hún gæti hafa heyrt eitthvað hjá honum og farið að leita á netinu í framhaldinu,“ segir Einar.

 „Við vorum að spila í Miami á þessum tíma og sögðum henni frá því. Hún var spennt fyrir því að mæta en þurfti að vera í New York á sama tíma. Ég veit að minnsta kosti ekki til þess að hún hafi mætt.“ Væntanlega er það rétt hjá Einari enda fer nærvera Lindsay sjaldnast framhjá neinum vegna þess aragrúa af ljósmyndurum sem fylgir henni við hvert fótmál. Einar segist ekki hafa heyrt í Lindsay nýverið enda er hún búin að loka myspace-síðunni sinni.