Vona að ég nái fimmtugu

Baldur Trausti Hreinsson, leikari, er fertugur í dag. Þegar Fréttablaðið náði tali af honum í vikunni þótti leikaranum varla um stórt afmæli að ræða. „Í sjálfu sér ekki. En þetta er ákveðinn áfangi, jú. Ég er búinn að kvíða þessu svolítið, en ég er að jafna mig,“ sagði Baldur. „Þetta er eins og einhver sagði, það er annað hvort þetta eða að fara hina leiðina. Ég held að þessi sé skárri,“ bætti hann við.

Baldur er fastráðinn við Þjóðleikhúsið, þar sem hann leikur nú í Sitji guðs englar. „Ég er í smá pásu frá æfingum, en byrja aftur í apríl. Þá hefjast æfingar á Skilaboðaskjóðunni, að ég held,“ sagði hann.

Baldur kveðst ekki vera mikið afmælisbarn, og segir aðra fjölskyldumeðlimi sjá um að hampa slíkum viðburðum. Hann komist því ekki upp með að gleyma afmælunum alveg. Hann hafði hins vegar lítið hugsað fyrir deginum sjálfum, og áformaði ekki mikil veisluhöld.

„Það verða örugglega einhverjir sem að kíkja á mig. Þá býð ég bara upp á vöfflur með rjóma eða eitthvað. Ég er ekki einu sinni búinn að ákveða það, svona langt er ég kominn í undirbúningi,“ sagði hann hlæjandi. „Ég vona bara að ég verði fimmtugur. Ég ætla að bíða með allar veislur þangað til,“ bætti hann við. Aðspurður hvort sú veisla yrði ekki vegleg, til að vinna upp á móti fertugsafmælinu, hló Baldur. „Ja, ég hef að minnsta kosti tíu ár til að undirbúa hana. Það er ansi góður tími.“

Yfirvofandi afmæli þótti Baldri þó merkilegra en þau sem liðin eru. „Þessi aldur er svona öðruvísi. Maður skilur þarna við þrítugsaldur og fertugsaldur og er allt í einu kominn á fimmtugsaldur. Það er svona svolítið stærra,“ sagði hann. „Pabbi minn var til dæmis fjörutíu og fimm ára þegar hann varð afi. Svo það er ekkert langt í þetta. En svo eru alltaf sumir sem klappa manni á bakið og segja að þetta sé rétt að byrja þegar maður verður fertugur. Það kemur bara í ljós, en ég vona það,“ sagði Baldur.