Rómantískt afmæli Pete

Ofurfyrirsætan Kate Moss kom kærastanum Pete Doherty á óvart á afmæli hans á mánudaginn. Kate leigði þyrlu fyrir þau skötuhjúin sem flutti þau á rólegan stað úti á landi þar sem þau fóru í lautarferð.

Breskir fjölmiðlar greina frá því að Kate og Pete, sem lengi hefur barist við eiturlyfjafíkn sína, hafi lagt af stað með körfu fulla af góðgæti fyrir lautarferðina. Sjálfur hélt Pete á flösku af kampavíni en Moss var með myndbandstökuvél til að festa atburðinn á filmu.

Pete varð 28 ára á mánudaginn og afsannaði þar með kenningu margra að hans biðu sömu örlög og rokkaranna Jimi Hendrix og Jim Morrison, en hraður lífsstíll þeirra dró þá til dauða 27 ára gamla.