Kemur á óvart að verjandi Kompáslögmannsins tjái sig

Ritstjórn Kompás segir að það komi verulega á óvart að verjandi lögmannsins sem var til umfjöllunar í Kompás í gær hafi sent frá sér yfirlýsingu vegna þáttarins. Í yfirlýsingunni tjái hann sig um efnisatriði sakamáls sem nú er fyrir Héraðsdómi Reykjavíkur. Lögmaðurinn og umbjóðandi hans, hafi hafnað því að tjá sig við Kompás við vinnslu þáttarins. Hafi Einar Gautur meðal annars vísað til þess að sér væri ekki heimilt að tjá sig um efnisatriði þar sem þinghald í dómsmálinu væri lokað.

Í yfirlýsingu frá ritstjórn Kompás segir „Einar Gautur fullyrðir að í Kompásþættinum sé gefið í skyn að ákæran gegn skjólstæðingi hans lúti að „einhverju verra" en fram komi í ákæruskjali og að „óviðurkvæmileg" orð séu notuð sem samrýmist ekki ákæruskjali. Því er til að svara að í Kompásþættinum var vitnað beint í ákæruskjalið sjálft og það sýnt. Þar er ekkert gefið annað í skyn en það sem fram kemur í ákæru. Aftur á móti leyfir Einar Gautur sér að túlka ákæruna með sérstöku orðavali og segir hana snúast um að skjólstæðingnum sé gefið að sök að „hafa haft ólögmætt frumkvæði að samskiptum við þrjár unglingsstúlkum". Vegna þessa orðalags er rétt að halda því til haga að skjólstæðingnum er gefið að sök að hafa tælt þrjár unglingsstúlkur til kynferðismaka og greitt þeim fyrir. Samkvæmt ákæruskjali komst umbjóðandinn í samband við stúlkurnar með blekkingum á netinu með því að þykjast vera 17 ára unglingur.

Í bréfi Einars Gauts segir hann skjólstæðing sinn hafa átt í samskiptum við eina stúlkuna sem hafi verið með „eðlilegum hætti". Er þar væntanlega vísað til kynferðissambands sem umbjóðandinn, þá 59 ára, átti við fjórtán ára unglingsstúlku - samband sem hann hefur viðurkennt í bréfi til lögreglu og er það samband sagt hafa verið ".. með eindæmum innilegt og gott.."

Þó að Einar Gautur minnist ekki á það í athugasemd sinni skal því einnig haldið til haga að skjólstæðingurinn er ákærður fyrir vörslu barnakláms en samkvæmt ákæruskjalinu fundust fjórar myndbandsspólur og 225 ljósmyndir sem sýna börn á kynferðislegan og klámfengin hátt í tölvum á vinnustað og heimili hans.

Einar Gautur segir það dómgreindarleysi hjá Kompás að gefa í skyn að vandamál stúlknanna verði rakin til samskipta við umbjóðandann. Fullyrðir hann að fyrir liggi að þau vandamál eigi sér allt aðrar rætur. Það er mat forráðamanna unglingsstúlknanna að djúpstæð sálræn vandamál stúlknanna megi beint rekja til samskipta við skjólstæðinginn. Það mat sé meðal annars stutt af sérfræðingum.

Kompás telur ásakanir um dómgreindarleysi og ósmekklegheit ekki svaraverð. Kompásþátturinn í gær fjallaði einfaldlega um þá staðreynd að lögmaður sem ákærður hefur verið fyrir kynferðisbrot gegn fjórum unglingsstúlkum, skuli á sama tíma, vera verjandi meintra barnaníðinga og vera viðstaddur yfirheyrslur og fá aðgang að trúnaðarskýrslum um brotaþola kynferðisofbeldis," segir í yfirlýsingunni.

Undir yfirlýsinguna rita Jóhannes Kr. Kristjánsson ritstjóri og Kristinn Hrafnsson fréttamaður.