Togstreitan á milli Íslendinga og Dana er sprenghlægileg

Leikstjórinn Lars von Trier ræðir um togstreitu milli Dana og Íslendinga í nýju viðtali. Hann segir að spennan á milli þjóðanna geti skapað vandamál.

Atriðin þar sem togstreitan á milli Íslendinga og Dana fær að njóta sín best eru fyndnustu atriðin í nýjustu mynd Lars von Triers, Direktören af det hele, að því er danski leikstjórinn segir sjálfur í nýju viðtali við kanadíska dagblaðið Globe and Mail. Von Trier segir enn fremur að þessi atriði hafi uppskorið mestu hlátrasköllinn frá áhorfendum í þau skipti sem myndin hefur verið sýnd í bíóhúsum.

Fornar og nýjar valdadeilur á milli Íslendinga og Dana eru helsta umfjöllunarefni myndarinnar en hún fjallar um tilraun Dana til að fá íslenska auðkýfinga til að kaupa verðlaust tölvufyrirtæki. Friðrik Þór Friðriksson og Benedikt Erlingsson eru sem kunnugt er í stórum hlutverkum í myndinni.

„Spennan á milli þessara þjóða getur skapað vandamál,“ segir Trier í viðtalinu og vísar sem dæmi í samstarf sitt við Björk í myndinni Dancer in the Dark, en blaðamaður bætir við að íslenska söngkonan sé sérvitur poppstjarna. „Ooooo, það var ekki auðvelt,“ segir Trier í viðtalinu og hristir hausinn með bros á vör þegar hann lýsir samstarfinu við Björk.

Von Trier stiklar á stóru í viðtalinu og segir meðal annars frá því að hann hyggist gera hryllingsmynd á næstunni. Þá segir leikstjórinn að hann hafi misst trúna á kvikmyndahátíðinni í Cannes, en Direktören af det hele er fyrsta myndin sem hann frumsýnir ekki í Cannes. „Hátíðin hefur ekki svo mikla þýðingu lengur fyrir mig. Það er mikið álag sem fylgir því að vera í Cannes og einu sinni fór ég í 150 viðtöl sama daginn. Það er bilun. Kvikmyndir fá ekki rétta umfjöllun með svo stuttum viðtölum,“ segir Von Trier.