Valdís tekur sig aftur á flug

„Af hverju ekki? Ég er orðinn 47 ára og hugsaði með sjálfri mér að annað hvort er það núna eða aldrei,“ segir útvarpskonan góðkunna Valdís Gunnarsdóttir sem stundar nú nám í Flugfreyjuskólanum.

„Ég var flugfreyja hjá Iceland Air á árunum 1985 til 1990 en hætti vegna anna í útvarpinu. En mig hefur alltaf langað til að fara aftur enda er þetta starf sem heldur alltaf í mann. Kannski að það lúti sömu lögmálum og hjá skátunum; einu sinni flugfreyja, alltaf flugfreyja,“ segir Valdís.

Útvarpskonan fékk þó enga sérmeðferð þrátt fyrir fyrri reynslu, mætti í inntökuprófið ásamt ellefu hundruð öðrum stelpum og strákum. Þar á meðal Jónsa úr Svörtum fötum. „Ég var bara eins og hver annar byrjandi, fór í inntöku-og tungumálaprófið og allt heila klabbið. Og núna er ég bara æðislega þakklát og auðmjúk fyrir að hafa verið tekinn inn og hlakka til að hitta gamla starfsfélaga,“ segir Valdís

Útvarpskonan viðurkennir að hún standi á ákveðnum tímamótum. Sunnudagsþáttur hennar á Bylgjunni hefur verið í loftinu um þó nokkurn tíma og hún íhugar nú alvarlega að leggja útvarpið á hilluna. „Ég held áfram með þáttinn fram á vor og ætla síðan að sjá til með haustinu hvort grundvöllur sé fyrir frekara samstarfi,“ segir Valdís.

Hún bjóst þó ekki við því að farþegar fengju að heyra hljómþýða rödd hennar í flugvélunum strax. „Þegar maður er nýliði þá fær maður ekkert að gera slíkt heldur er það í verkahring hinna eldri og reyndari. En ég er hrædd um að það verði níðst á mér,“ segir Valdís og hlær, bætir því síðan við að á sínum tíma hafi ófáir farþegarnir haft það á orði að þegar Valdís bauð þá velkomna um borð hafi þeim strax liðið eins og þeir væru komnir heim. „Og það yljaði mér um hjartaræturnar.