Tískugúrúinn Ási í útrás

Fatahönnuðurinn og stílistinn Ásgrímur Már Friðriksson, sem hefur meðal annars getið sér góðs orðs hér á landi fyrir sköpunarverk sín fyrir Silvíu Nótt, er lagstur í útrás og fluttur til Danmerkur.

Þar starfar Ásgrímur, sem iðulega er kallaður Ási, á tímaritinu Cover, sem nýtur töluverðrar hylli í tískuheiminum. „Ég er aðstoðar-„fashion director", eða tískustjórnandi," útskýrði Ási, sem flutti af landi brott í mars og hefur starfað á Cover síðastliðna tvo mánuði.

Ási segir danska tísku vera í uppsveiflu og hefur í nógu að snúast. „Ég er bara mjög sáttur, þótt það sé brjálað að gera," sagði hann og hló við. „Þetta er rosa flott tímarit, það flottasta hér. Það er meira „avant garde" en hin blöðin. Það er um allt sem tengist sköpun; tónlist, myndlist, lífsstíl, fatahönnun og tísku," sagði Ási, en í verkahring hans felst stílistavinna, greinaskrif, viðtöl og skrif í vefrit blaðsins. Aðspurður hvort dönskukunnátta hans sé svona góð skellir hann upp úr. „Ég skrifa á ensku, og svo er það þýtt. Það er svo langt síðan að maður lærði dönsku," sagði hann sposkur.

Danmörk er þó ekki endanlegur áfangastaður hjá Ása. „Þetta er svona fyrsta stoppið. Ég ætla að hoppa á milli landa í einhvern tíma. Ég var ekkert bundinn heima og langaði að komast út og upplifa eitthvað nýtt," útskýrði hann. „Næst verður það London, París eða Berlín. Framtíðin leiðir það bara í ljós," sagði hann.