Lögreglan fylgist með klámframleiðslu

„Ég stefni á að byrja á miðvikudag. Við ætlum að vera í bílskúr hjá félaga mínum og nýta hann sem sviðsmynd," segir Sigurður Valdimar Steinþórsson, eigandi vefsíðunnar klam.is, hann hyggst hefja framleiðslu á íslensku netklámi.

Enn á þó eftir að staðfesta fjölda leikara í fyrstu myndinni en Sigurður hyggst ganga frá því á allra næstu dögum. „Það eru skiptar skoðanir um hvað má og hvað má ekki og til að mynda er klám oft skilgreint hvort kynfæri karls sést fara inní kynfæri kvenna. BogB hefur hins vegar gert þetta og hver veit nema ég fari líka útí slíkt." Aðspurður hvort allir fjölskyldumeðlimir væru sáttir með starfið sagði Sigurður. „Bæði og. Mamma er ekki sátt og vill að ég hætti þessu en hún sér að það er ekkert að fara gerast."

Samkvæmt 210.grein hegningarlaga er ólöglegt að framleiða og dreifa klámi á Íslandi. Þær upplýsingar fengust hjá Geir Jón Þórissyni, yfirlögregluþjóni, að yfirvöld gætu hins vegar ekkert gert fyrr en brotið hefði verið framið. Björgvin Björgvinsson, yfirmaður kynferðisbrotadeildar lögreglunnar, sagði þá fylgjast vel með gangi mála.

„Hins vegar er erfitt að aðhafast eitthvað fyrr en þetta er komið í dreifingu," segir Björgvin. Aðspurður hvort þeir vissu af vefsíðunni klam.is þar sem finna má klámefni sagði hann svo vera. „En lagaumhverfið hjá okkur sem og hjá öðrum vestrænum löndum bindur hendur okkar. Þetta efni er yfirleitt hýst hjá löndum þar sem yfirvöld eiga erfitt með athafna sig," útskýrir Björgvin en upplýsti þó að ef umræddu efni yrði dreift á netið mætti Sigurður eiga von á heimsókn frá laganna vörðum.