Peð í uppnámi, hætt við sýningar

Stjórn leikhópsins Peðið ákvað á fundi sínum fyrr í kvöld að hætta við fyrirhugaðar sýningar sínar á leikritinu Barperan í næsta mánuði. Til stóð að halda 10 sýningar á verkinu á efri hæð menningarbúllunnar Grand Rokk. Hinsvegar mun hafa kastast alvarlega í kekki milli Bergs Thorbergs sem leikur aðalhlutverkið í leikritinu og Þorsteins Þórsteinssonar verts á Grand og endaði það með því að Bergur var settur í straff á barnum.

Björn Gunnlaugsson framkvæmdastjóri fyrir uppfærsluna segir að þetta sé ekki í fyrsta sinn sem leikhópurinn hafi reynt að setja Barperuna aftur á svið en leikritið var fyrst flutt á menningarhátíð Grand í fyrra. "Það virðist eins og örlögin vilji ekki að þetta stykki verði endurflutt," segir Björn.

Fram kemur í máli Björns að Þorsteinn vert hafi verið tilbúin til sátta við Berg ef það mætti verða til að bjarga uppfærslunni. Það vildi Bergur hinsvegar ekki fallast á.

Aðspurður um hvað framundan sé hjá Peðinu segir Björn að hópurinn sé síður en svo að leggja upp laupana þrátt fyrir þessa erfiðleika. "Við erum að huga að öðrum verkefnum nú og það kemur í ljós á næstunni hvað við tökum okkur fyrir hendur," segir Björn.