Victoria Beckham með verstu brjóstaskoruna

Lýtalæknirinn Patrick Mallucci hefur lagst í rannsóknir á bestu og verstu brjóstaskorunni og komist að þeirri niðurstöðu að módelið Caprice Bourret skarti fegursta barminum á meðan Victoria Beckham þykir bera þann versta.

Mallucci mun kynna niðurstöður sínar á alþjóðlegri ráðstefnu um brjóstastækkanir sem haldin verður í London í næstu viku. Hann vonast til að fyrirlesturinn Concepts in Design for Breast Augmentation veiti öðrum lýtalæknum innblástur.

„Ég skoðaði fjölda mynda af vinsælustu fyrirsætum heims til að finna út þann barm sem þykir eftirsóknarverðastur. Ég komst að þeirri niðurstöðu að hjá konum sem skarta fegursta barminum eru 45 prósent brjóstsins fyrir ofan geirvörtu og 55 prósent fyrir neðan.

Öll módelin sem ég skoðaði voru með náttúruleg brjóst og voru þau fallegust í þessum hlutföllum. Ég vonast til að hægt sé að hafa þau hlutföll til viðmiðunar þegar brjóstaaðgerðir eru gerðar svo að útkoman verði sem eðlilegust," segir Mallucci. Hann bætir við að kúnnar frábiðji sig því að fá barm sem líkist þeim sem Victoria Beckham skartar en hann þykir mjög óraunverulegur.

Brjóstastækkun er vinsælasta lýtaaðgerðin í Bretlandi og voru 6.156 slíkar aðgerðir framkvæmdar í fyrra.