Vara við litarefnum sem valda hegðunarvanda hjá börnum

Neytendasamtökin hvetja íslenska neytendur til að sniðganga matvæli sem innihalda hin umdeildu asó-litarefni. Fram kemur í frétt á heimasíðu samtakanna að efnin geti valdið ofvirkni og hegðunarvanda hjá börnum. Efnin eru algeng í hvers konar sælgæti.

„Á meðan rannsóknir gefa til kynna að efnin geti valdið skaða er rétt að vara við þeim," sagði Brynhildur Pétursdóttir, hjá Neytendasamtökunum, í samtali við Vísi. „Börnin eiga að njóta vafans."

Fram kemur á heimasíðu Neytendasamtakanna að í Danmörku séu neytendur nú hvattir til að sniðganga matvæli sem innihalda asó-litarefnin E102, E104, E110, E122, E124 og E129. Ennfremur segir á heimasíðu samtakanna að nýlegar rannsóknir sýni fram á samhengi milli asó-litarefna og rotvarnarefnisins E211og ofvirkni og hegðunarvanda hjá börnum. Eru íslenskir neytendur einnig hvattir til að sniðganga matvæli sem innihalda þessi efni.

Brynhildur segir efnin vera algeng í matvælum hér á landi og þau megi helst finna í hvers konar sælgæti. Hvetur hún neytendur til að hafa augun opin.