Helgi Torfason safnstjóri Náttúruminjasafns

Menntamálaráðherra hefur skipað dr. Helga Torfason í embætti safnstjóra Náttúruminjasafns Íslands til fimm ára frá og með deginum í dag. Eftir því sem fram kemur í tilkynningu frá menntamálaráðuneytinur er Náttúruminjasafn Íslands ný stofnun sem stofnuð var með lögum sem samþykkt voru á Alþingi í vor.

Því er ætlað að vera höfuðsafn á sviði náttúrufræða og hefur það hlutverk að varpa ljósi á náttúru Íslands, sögu landsins, nýtingu og náttúruvernd.

Helgi Torfason er doktor í jarðfræði frá University of Liverpool. Hann hefur starfað sem verkefnastjóri jarðhitamála hjá Orkustofnun og þar áður sem sviðsstjóri jarðfræðisviðs og fagsviðsstjóri hjá Náttúrufræðistofnun Íslands. Alls bárust sjö umsóknir um embættið.