Mills vill milljón á dag

Heather Mills hefur sett fram kröfur um háar greiðslur úr búi fyrrum eiginmanns síns, Pauls McCartney. Málið er í hnút því Paul neitar öllum slíkum tilboðum.

Skilnaður sir Paul McCartney og Heather Mills virðist ekki ætla að ganga ljúflega fyrir sig. Eins og kom fram í fjölmiðlum fyrir nokkrum mánuðum gengu fúkyrði og ásakanir um ofbeldi og kúgun þeirra á milli en öldurnar lægði eftir sameiginlega ákvörðun um að fara með málið fyrir dómstóla. Deilurnar risu þó á ný og það andar köldu milli hjónakornanna fyrrverandi.

Mills hefur sett fram kröfu um að bítillinn fyrrverandi greiði henni milljón á dag, sömu upphæð og knattspyrnukappinn Wayne Rooney fær frá Manchester United á hverjum degi. Mills hefur jafnframt boðist til að flýta fyrir málsmeðferðinni en það kosti McCartney rúmar fjörutíu milljónir punda sem samsvarar fimm milljörðum íslenskra króna. Sir Paul hefur hafnað báðum þessum tilboðum. „Þetta eru ótrúlegar kröfur," hefur breska blaðið The Sun eftir nánum vini bítilsins.

Vonast hafði verið til að hvorki Paul né Heather þyrftu að mæta fyrir dómara en samkvæmt götublaðinu hafa þau bæði látið sjá sig í réttarsal Lundúna þrívegis. Heimildarmenn innan herbúða McCartneys segja Paul ekki sætta sig við það mat sem fram hefur farið á eignum hans en samkvæmt lista The Sunday Times yfir ríkustu menn Bretlands eru auðævi McCartneys metinn á 115 milljarða íslenskra króna. „Paul er ekki svona ríkur, þetta er algjört ofmat á ríkidæmi hans. Paul á í mesta lagi 500 milljónir punda," hefur The Sun eftir vini bítilsins.

Fjandskapurinn milli Mills og McCartneys virðist hafa aukist með hverjum degi, þau hittast ekki þegar Beatrice kemur til þeirra og samkvæmt The Sun má telja líklegt að réttarhöldin dragist verulega á langinn, jafnvel fram á næsta ár.