Illugi sigraði Bryndísi

Bryndís Sveinsdóttir, blaðamaður og nemi, var Illuga Jökulssyni, hinu þekkta spurningaljóni, engin fyrirstaða í fjórða þætti Meistarans á Stöð 2 sem var í gærkvöldi. Illugi náði forystu snemma í þættinum og hélt henni allt til enda. Og sigraði með miklum yfirburðum eða 25 gegn 8 stigum Bryndísar.

Illugi hefur greinilega lært af reynslunni, en hann tók þátt í Meistaranum í fyrra. Honum var boðið að velja stóru spurninguna í ljósi öruggrar forystu sinnar. Og með réttu svari hefði hann getað unnið sér inn væna fúlgu. En misst forystuna niður í fimm stig ella. Illugi afþakkaði enda fór hann flatt á slíkum æfingum í fyrstu þáttaröðinni.

Eftir frammistöðu Illuga núna má ljóst vera að hann verður andstæðingum sínum erfiður viðureignar.

Með sigrinum er Illugi kominn í átta liða úrslit ásamt þeim Helga Árnasyni, Páli Ásgeiri Ásgeirssyni og Magnúsi Lúðvík Þorlákssyni. Næsta viðureign er svo á milli hinna mjög svo fjölfróðu Sigurðar G. Tómassonar og Björns Guðbrands Jónssonar.