Pamela Anderson skammar Finna fyrir loðdýrarækt

,,Finnland þarf að ganga inn í 21 öldina og hætta loðdýrarækt." Þetta eru skilaboðin frá Pamelu Anderson til forseta landsins.

Í opnu bréfi til Tarja Halonen, forseta Finnlands, segir Anderson: ,,Ég er stolt af finnskum rótum fjölskyldu minnar, en ég var vonsvikin þegar ég komst að því að fleiri refir eru drepnir í Finnlandi en nokkurs staðar annars staðar í heiminum."

Anderson, sem er öflugur talsmaður réttinda dýra, er í Finnlandi vegna Jónsmessu.

Halonen þakkaði Anderson fyrir bréfið, en sagði að það væri hlutverk ríkisstjórnarinnar að taka ákvarðanir um loðdýrarækt.

Finland er einn af fjórum helstu loðdýraræktendum í heimi ásamt Danmörku, Noregi og Hollandi. Árleg loðfeldaframleiðsla landsins nemur um 21 milljarði króna.