Síld brædd í Bolungarvík í fyrsta skipti í tvö ár

Hákon EA liggur nú við bryggju í Bolungarvík en til stendur að bræða 350 til 400 tonn af síldarafskurði í bænum. Þetta mun vera í fyrsta sinn síðan 2005 sem síld kemur að landi í Bolungarvík.

Einar Jónatansson, framkvæmdastjóri hjá Gná í Bolungarvík segir þetta ágætis búhnykk fyrir fyrirtækið þó magnið sé ekki mikið. Hann segir skipið vera að koma frá Grundarfirði þar sem veiðst hafi ágætlega og nú ætli menn að reyna fyrir sér undan Vestfjörðum.

Einar segist ekki vita hvort von sé á fleiri skipum til hafnar en þeir séu reiðubúnir að taka við ef á þarf að halda.