Hefur pabbi þinn farið á Vog?

Ef þú ert karlmaður þá eru 50% líkur á því að þú komir á Vog fyrir sjötugt ef faðir þinn hefur farið í meðferð á Vogi.

Þetta kom fram hjá Þórarni Tyrfingssyni yfirlækni á Vogi í fréttum Sjónvarpsins nú í kvöld. Þar talaði Þórarinn um mikilvægi þess að fjölskyldan geri sér grein fyrir áfengisvandamálum og hagi lífi sínu í samræmi við það.

Þórarinn og Dagur B. Eggertsson undirrituðu í dag samstarfssamning milli Reykjavíkurborgar og SÁÁ. Markmið samningsins er m.a. að auka forvarnarstarf, bæta þjónustu við áfengis- og vímuefnasjúklinga og efla tengsl meðferðaraðila og velferðarþjónustu.

Samkvæmt samningnum kaupir Reykjavíkurborg þjónustu af SÁÁ fyrir samtals 55 milljónir króna á næstu þremur árum.