Gjörgæslan stækkuð á Landspítalanum við Hringbraut

Guðlaugur Þór Þórðarson, heilbrigðis- og tryggingamálaráðherra, hefur ákveðið að gjörgæsla Landspítala við Hringbraut verði stækkuð eins fljótt og verða má.

Þetta þýðir að Landspítalinn fær sérstaka 35 milljóna króna fjárveitingu á næsta ári til að stækka gjörgæsluna og hækkar greiðsluáætlun LSH til samræmis við það eftir því sem segir í tilkynningu frá heilbrigðisráðuneytinu. „Bæði Landspítalinn og nefnd sem vinnur að tillögum um framtíðarskipulag fasteigna og annarrar aðstöðu innan heilbrigðiskerfisins undir forystu Ingu Jónu Þórðardóttur hafa hvatt til og dregið fram kostina við að stækka gjörgæsluna. Húsafriðunarnefnd hefur fjallað um málið og samþykkti fyrir skemmstu stækkunaráform gjörgæslunnar á LSH við Hringbraut," segir enn fremur í tilkynningunni.

Aðstaða fyrir sjúklinga mun stórbatna við stækkunina og betri aðstaða skapast á gjörgæslunni til að koma fyrir og geyma flókinn búnað sem fylgir gjörgæslustarfsemi. Hægt verður með þessu að taka á móti fleiri sjúklingum og flæði sjúklinga verður þar með meira segir heilbrigðisráðuneytið.