Kaupa 15 íbúðir fyrir geðfatlaða

Hleypt var af stokkunum nýju átaksverkefni félagsmálaráðuneytisins í dag sem miðar að því að efla þjónustu og búsetuúrræði geðfatlaðra.

Verkefnið hefur fengið nafnið Straumhvörf og nær til 160 einstaklinga á landinu öllu sem þurfa búsetu á vegum svæðisskrifstofu eða félagsþjónustu sveitarfélaga. Fram kemur í tilkynningu frá félagsmálaráðuneytinu að markmið verkefnisins sé að bjóða fólki búsetu í einstaklingsíbúðum utan stofnana og styrkja þjónustu sem eflir virkni geðfatlaðra. Ásta R. Jóhannesdóttir alþingismaður er formaður verkefnisstjórnar Straumhvarfa.

Jóhanna Sigurðardóttir félagsmálaráðherra undirritar í dag samkomulag við Brynju, hússjóð Öyrkjabandalagsins, um kaup á 15 íbúðum í Reykjavík sem notaðar verða í þágu geðfalaðra. Íbúðirnar hafa þegar verið teknar í notkun. Stofnframlag Straumhvarfa til kaupanna er 210 milljónir króna.

Með þessum íbúðum hefur verið tekið í notkun í Reykjavík húsnæði fyrir 27 einstaklinga á árinu 2007 fyrir atbeina Straumhvarfa, að hluta til í samstarfi við Reykjavíkurborg. Þar sem þörf er á verður um sólarhringsþjónustu að ræða en reynslan sýnir að unnt er að fella niður næturvakt þegar þjónustan er komin í fastar skorður. Dagleg framkvæmd þjónustunnar verður á vegum Svæðisskrifstofu málefna fatlaðra í Reykjavík.

Þá undirritaði félagsmálaráðherra einnig samninga um að styrkja tvenn sjálfstæð félagasamtök, Klúbbinn Geysi og Geðhjálp, um 10 milljónir króna á tveimur árum. Markmið samninganna er að styrkja dagþjónustu sem veitt er á vegum félaganna. Fjárstuðningur Straumhvarfa kemur til viðbótar þeim fjárframlögum sem Klúbbnum Geysi og Geðhjálp eru veitt á fjárlögum ríkisins eftir því sem segir í tilkynningu félagsmálaráðuneytisins.