Ungt þjófagengi dæmt í 33 mánaða fangelsi

Fjórir piltar á aldrinum 15-18 ára voru í Héraðsdómi Reykjavíkur í dag dæmdir í samtals 33 mánaða skilorðsbundið fangelsi fyrir fjölda innbrota í Reykjavík og Kópavogi snemma á þessu ári.

Alls voru ákæruliðirnir í málinu þrettán talsins. Mennirnir brutust nótt eina í febrúar inn í fjórar verslanir og höfðu þaðan á brott með sér meðal annars vasaúr, tölvu, ljósmyndavélar og rakvélar og hársnyrtivörur. Nóttina eftir stálu þeir svo tölvu í fimmta fyrirtækinu. Einn mannanna var auk þess ákærður fyrir að aka bíl undir áhrifum fíkniefna í sumar.

Piltarnir játuðu allir brot sín og fóru fram á vægustu refsinga. Sá sem þyngstan dóm hlaut fékk 12 mánaða skilorðsbundið fangelsi en hann átti að baki refsingu fyrir önnur brot. Þá var einn dæmdur í níu mánaða skilorðsbundið fangelsi og tveir í hálfs árs skilorðsbundið fangelsi.

Voru dómarnir skilorðsbundnir þar sem dómurinn taldi að piltarnir hefðu snúið af villu síns vegar og vegna þess að þeir játuðu brot sín greiðlega.