Skriður og grjóthrun á Vestfjörðum í gærkvöld

Fjögur ungmenni sluppu ómeidd þegar aurskirða féll á bíl þeirra á þjóðveginum í Eyrarhlíð á milli Ísafjarðar og Hnífsdals í gærkvöldi. Grjót hrundi á Óshlíðarveg og krapaskriður á þjóðveginn í Djúpi.

Ungmennin í Eyrarhlíð komust út úr bílnum og hlupu yfir skriðuna þar sem þau komust í skjól í öðrum bíl. Skriðan var um 50 metra breið og tveir metrar á dýpt þar sem mest var. Veginum var lokað og féllu þrjár skriður á hann til viðbótar í nótt. Vegagerðarmenn ruddu svo veginn undir morgun þegar loksins stytti upp.

Þá hreinsaði Vegagerðin snemma í morgun aurspýjur og grjót sem féllu á Óshlíðarveg til Bolungarvíkur í nótt og undir hádegi var verið að ryðja krapaskriðum af veginum í Skutufirði og Hestfirði við Djúp. Gríðarleg úrkoma og hvassviðri voru vestra í gærkvöldi og var Eyrin á Ísafirði eins og tjörn yfir að líta þar sem niðurföll höfðu ekki undan.

Vatn flæddi í kjallara sjúkrahússins og var slökkviliðið við dælingu þar í alla nótt. Björgunarsveitarmenn voru lögreglu til aðstoðar og heftu meðal annars folk af Edinborgarhúsinu og björgunarsveitarmenn í Bolungarvík fergðu þak á húsi með armi á stórri skurðgröfu.