Bátur sökk í Reykjavíkurhöfn

Sjötíu tonna mannlaus eikarbátur, Brokey frá Patreksfirði, sökk við bryggju í Reykjavíkurhöfn síðdegis í gær. Þegar þessar myndir voru teknar skömmu fyrir hádegi sást olía leka úr bátnum og sagði vitni í samtali við Stöð tvö að meiri olía hefði lekið úr bátnum í gær og undraðist aðgerðarleysi hafnaryfirvalda.

Hafnsögumaður sem rætt var við í morgun sagði Stöð tvö að hafnarstarfsmenn hefðu ekki orðið varir við olíuleka og töldu ekki ástæðu til að grípa til aðgerða. Ekki er vitað hversvegna báturinn sökk en að sögn hafnsögumanns hafði hann legið við bryggjuna í nokkur ár í hirðuleysi. Reynt verður að ná honum upp eftir helgi. Báturinn var smíðaður árið 1955 í Danmörku.