Hálfsextug staðin að hnupli í Kringlunni

Hálfsextug kona var í gær tekin fyrir að hafa stolið fatnaði úr tveimur verslunum í Kringlunni.

Þá var rúmlega tvítug kona stöðvuð fyrir sömu sakir í Smáralind. Sú hafði farið í mátunarklefa verslunar með náttslopp og nærföt og klippti þar þjófavörnina af vörunum. Hún tók síðan náttsloppinn ófrjálsri hendi en skildi nærfötin eftir í klefanum. Aðspurð um nærfötin sagðist konan hafa ætlað að stela þeim líka en hætt við þegar í ljós kom að þau pössuðu ekki á hana.

Í frétt lögreglunnar segir enn fremur að nokkur innbrot hafi verið tilkynnt í gær. Þar á meðal var tveimur fartölvum stolið úr húsi í Garðabæ, skartgripir og myndavél voru tekin af heimili í Árbæ og í Hafnarfirði var brotist inn í tvær geymslur í fjölbýlishúsi.