Starfshópur skoðar heimanám yngstu grunnskólanema

Menntaráð Reykjavíkur hefur ákveðið að skipa starfshóp til þess að skoða heimanám nemenda í grunnskólum borgarinnar, sérstaklega yngstu barnanna.

Á hópurinn að vinna tillögur á grundvelli könnunar sem menntasvið gerði á því hvernig skólar hafa nýtt svokallaða viðbótarstund í öðrum til fjórða bekk. Þeirri stund var ætlað að gefa kost á heimanámi í skólanum undir handleiðslu kennara en nú nýta flestir skólar hana í almenna kennslu og í list- og verkgreinakennslu.

Skiptar skoðanir eru meðal forleda og kennara hvort vinnudagur yngstu nemenda grunnskólans sé of langur og hvort heimanám eigi rétt á sér og á starfshópurinn að skoða málið með því að ræða við báða aðila.