Tæknileg mistök sýndu Árna Johnsen á grafarbakkanum

Tæknileg mistök við úrvinnslu á blóðsykursprófi sem allir alþingismenn gengust undir á dögunum sýndu að Árni Johnsen var á grafarbakkanum.

Á þeim skala sem notaður er við mælinguna er eðlilegt að vera á bilinu 4 til 6. Mælingin hjá Árna Johnsen sýndi hins vegar 30. Árni vill sjálfur ekkert tjá sig um málið en samkvæmt heimildum Vísis mun hann hafa tekið fyrstu fregnum af mælingunni með jafnaðargeði, sannfærður um að eitthvað væri bogið við þetta allt saman.

Af Árna er það annars að frétta að hann er staddur í London í dag og hefur tekist að útvega sér miða á leik Liverpool og Porto í kvöld. Árni er annars þekktur fyrir að halda með Manchester United en hvað er betri skemmtun en að horfa á "erkifjendurna" í mikilvægasta leik sínum þetta tímabilið.