Kona úrskurðuð í farbann vegna gruns um bókhaldsbrot

Kona var úrskurðuð í farbann til 21. desember í dag samkvæmt ákvörðun Hæstaréttar en hún sætir nú rannsókn vegna meintra skatta- og bókhaldsbrota.

Fram kemur í farbannsúrskurðinum að Ríkislögreglustjóra hafi í síðustu viku borist kæra Skattrannsóknarstjóra ríkisins á hendur konunni og fyrirtæki sem hún er skráð stjórnarformaður, framkvæmdastjóri og prókúruhafi fyrir. Eru brotin talin tengjast rekstri fyrirtækisins frá upphafi síðasta árs og fram til ágústmánaðar í ár.

Segir í úrskurðinum að sakarefnin séu umtalsverð og grunur leiki á um að konan hyggist ásamt fjölskyldu sinni fara af landi brott á næstunni. Telur lögregla að konan hafi reynt með þessu að koma sér hjá saksókn og því var farið fram á farbann yfir henni. Fulltrúi Ríkislögreglustjóra hefur lýst yfir að rannsókn málsins sé í forgangi og megi eftir atvikum ljúka henni innan tveggja eða þriggja vikna.