Kristján fer fyrir nefnd um flutningsjöfnun

Viðskiptaráðherra hefur skipað Kristján Þór Júlíusson, þingmann Sjálfstæðisflokksins, sem formann starfshóps um fyrirkomulag flutningsjöfnunar.

Hópnum er meðal annars ætlað að meta þau áhrif sem verða þegar Flutningsjöfnunarsjóður olíuvara verður lagður niður, með hvaða hætti skuli mæta þeim og jafna flutningskostnað almennt.

Fram kemur í tilkynningu frá viðskiptaráðuneytinu að kanna þurfi hvort grípa þurfi til aðgerða til flutningsjöfnunar til svæða þar sem flutningskostnaður er verulega íþyngjandi. Um árabil hafi verið til staðar jöfnun á kostnaði innan ákveðinna vöruflokka en almennt sé talið að sértækar lausnir skili síður árangri en almennar reglur.

Viðskiptaráðherra lýsti því yfir á Alþingi fyrir skemmstu að Flutningsjöfnunarsjóður olíuvara yrði ekki lagður niður fyrr en áhrif þess hefðu verið metin og útfært hefði verið hvaða fyrirkomulag skyldi taka við. Því verður sjóðurinn ekki lagður niður fyrr en að starfshópurinn hefur lokið störfum. Hópnum er gert að skila af sér niðurstöðu eigi síðar 1. júní á næsta ári.