Beina kröftum að áhættuhópum í fíkniefnabaráttu

Beina þarf auknum kröftum að áhættuhópum í baráttunni við fíkniefnavandann hér á landi að mati Guðfríðar Lilju Grétarsdóttur, þingkonu Vinstri - grænna. Hún var málshefjandi að utandagskrárumræðu um vandann og ráðstafanir af hálfu stjórnvalda til að sporna gegn honum á Alþingi í dag.

Sagði hún að bent hefði verið á foreldrar ættu að verja meiri tíma með börnunum sínum í forvarnarskyni en spurði hversu tilbúin þjóðin væri að breyta samfélagsmynstrinu, meðal annars með því að stytta vinnutíma og hækka laun. Þá benti hún á hátt brottfall úr framhaldsskólum og þá áhættu sem því fylgdi. Almennar forvarnir dygðu ekki einar og sér heldur þyrfti að beina auknum kröftum að áhættuhópum og þar þyrftu meðal annars heilbrigðis-, félagslega og dómskerfið að koma að málum.

Guðfríður Lilja innti Geir H. Haarde forsætisráðherra eftir stefnumörkun ríkisstjórnar varðandi fíkniefnavandann.

Forsætisráðherra benti á að nokkur árangur hefði þegar náðst í baráttuni við fíkniefnavandann. Þá sagði ríkisstjórnina hafa gert átak í forvörnum sem beindist að framhaldsskólnum. Þar hefðu mennta- og heilbrigðisráðherra tekið höndum saman ásamt Lýðheilsustöð og framhaldsskólunum í forvarnarstarfi.

Enn fremur væri gert ráð fyrir 100 milljónum króna í fjárlagafrumvarpi næsta árs til handa félagsmála-, heilbrigðis- og dómsmálaráðuneytinu til þess að bregðast við aukinni vímuefnavá. Þá benti Geir að lögregla hefði gripið til ráðstafana til þess að takast á við aukna hörku í fíkniefnaheiminum, meðal annars með því að efla sérsveitina og starfrækja greiningardeild. Það hefði þegar skilað nokkrum árangri.

Sagði sjálfstæðismenn ekki sannfærandi í málflutningi

Fjölmargir þingmenn tóku til máls lýstu yfir áhyggjum af ástandinu og var meðal annars bent á að hækka þyrfti hlutfall áfengisgjalds sem rynni í forvarnasjóð og styrkja starfsemi SÁÁ.

Siv Friðleifsdóttir, þingkona Framsóknarflokksins og fyrrverandi heilbrigðisráðherra, gerði harða hríð að sjálfstæðismönnum í umræðunni og sagði Sjálfstæðisflokkinn ekki sannfærandi sínum málflutningi um reykingar, áfengi og fíkniefni.

Vísaði hún til andstöðu afla innan Sjálfstæðisflokksins þegar ákveðið var að koma á reykingabanni á veitingastöðum. Þar hefði verið talað um forræðishyggju. Enn fremur benti hún á að þingmenn úr flokknum hefðu lagt áherslu á svokallað áfengisfrumvarp, sem gerir ráð fyrir að sala á léttvíni og bjór verði heimiluð í matvöruverslunum. Þar færi fremstur Sigurður Kári Kristjánsson þingmaður með stuðningi Guðlaugs Þórs Þórðarsonar heilbrigðisráðherra, yfirmanni forvarna á Íslandi. Íslendingar hafi verið á réttri leið í forvarnarmálum og ekki mætti glutra niður þeim árangri sem náðst hefði.