Koma upp olíugirðingu við flutningaskipið Axel

Björgunarsveitarfólk úr Björgunarsveit Hornafjarðar vinnur nú að því að koma upp olíugirðingu til þess að koma í veg fyrir hugsanlega olíumengun frá flutningaskipinu Axel sem strandaði á Borgeyjarboða við Hornafjarðarós í morgun.

Eftir því sem fram kemur í tilkynningu frá Landhelgisgæslunni barst tilkynning frá skipinu klukkan 8.20 um strandið. Það losnaði hins vegar af skerinu um fjórum mínútum síðar en þá var búið að senda út lóðsbát Hornafjarðarhafnar og Björgunarskipið Ingibjörgu. Verið er að kanna skemmdir á skipinu og skoða ástand olíutanka þar sem eitthvað virðist vera um olíuleka í sjó.

Aðalvél skipsins er ekki gangfær og bógskrúfurými er fullt af sjó. Unnið er að því að koma dráttartógi frá lóðsbátnum Birni yfir í skipið til að draga það fjær ströndu. Ekki er hægt að draga skipið til hafnar á Hornafirði að svo stöddu sökum óhagstæðra sjávarfalla en búist er við því að skipið verði dregið inn á einhverja Austfjarðahöfn. Varðskip er á leið á staðinn og er væntanlegt undir hádegið.

Axel er 2500 tonna frystiskip, byggt árið 1989. Skráður eigandi þess er Dregg ehf. en skipið er skráð á eyjunni Mön. Áhöfn skipsins, 11 manns, er öll íslensk.

Skipið var á útleið þegar óhappið varð og engar upplýsingar hafa fengist um tildrög þess. Axel hefur að undanförnu verið í ferðum á milli Íslands og meginlands Evrópu og gjarnan siglt á hinar ýmsu hafnir umhverfis landið.