Tímabærar breytingar á kennaramenntun

Elna Katrín Jónsdóttir varaformaður Kennarasambands Íslands, segir fyrirhugaðar breytingar í nýju menntafrumvarpi sem til stendur að leggja fram vera tímabærar og í takt við þróunina í nágrannalöndum okkar. Eins og greint var frá í fréttum RÚV í kvöld verður kennaranám í núverandi mynd lagt af á næstu árum og til stendur að krefjast meistaragráðu af kennurum framtíðarinnar. Fjögur ný frumvörp munu vera á teikniborðinu hjá menntamálaráðuneytinu og ná þau til leik-, grunn- og framhaldsskóla. Elna Katrín sat í nefnd sem fjallaði um framtíðarskipan kennaramentunnar og segir hún einhug hafa ríkt í nefndinni um tillögur í þessa veru.

Elna Katrín hefur enn ekki séð frumvörpin sem ekki hafa verið lögð fram en hún segir að breyting af þessu tagi sé tímabær og hún geri í raun ekki annað en að svara sambærilegum kröfum og gerðar eru í nágrannalöndum okkar. Hún bendir á þá staðreynd að kennaramenntun á Íslandi sé styttri en í flestum samanburðarlöndum.

Hún bendir einnig á að kennarastarfið sé sífellt að verða fjlóknara og fjölþættara og að vinnuumhverfi kennara hafi tekið miklum breytingum á undanförnum árum. Aðspurð hvaða áhrif þessi breyting muni hafa á núverandi kennara segir Elna Katrín það útilokað að réttindi verði tekin af fólki, hugsunin sé alls ekki að gjaldfella menntun og starfsreynslu núverandi kennara auk þess sem stór hluti kennara hafi í raun aflað sér frekari menntunar með framhaldsnámi eða símenntun.

Elna Katrín segist vona að frumvörpin fari greiða leið í gegnum umræður á Alþingi og bendir á að athyglisvert hafi verið að hve mikill einhugur var í starfi nefndarinnar sem skilaði inn hugmyndum til menntamálaráðherra á sínum tíma.