Þurftu að bíða af sér veðurhaminn í marga klukkutíma

Þjóðvegurinn undir Hafnarfjalli var lokaður flutningabílum frá því í gærkvöldi og framundir hádegi vegna ofsaveðurs á svæðinu. Á annan tug flutningabíla þurfti að bíða af sér veðurhaminn.

Mikið hvassviðri gekk yfir Vesturland í nótt og náði vindhraðinn á sumum stöðum yfir fjörtíu metrum á sekúndum. Í Grundarfirði fuku þakklæðningar af húsum og flaggstangir brotnuðu.

Verst var þó ástandið á vegarkaflanum undir Hafnarfjalli en þar náði vindhraðinn rúmlega 50 metrum á sekúndu.

Að minnsta kosti tíu flutningabílar biðu af sér veðurhaminn í Borgarnesi í nótt og aðrir sunnan við fjallið. Þeir fyrstu lögðu af stað í bæinn um klukkan sjö í morgun og umferð orðin eðlileg upp úr klukkan ellefu.

Þá slasaðist einn maður þegar bifreið sem hann ók fór útaf veginum við Hafnará í nótt. Hann náði af sjálfsdáðum að komast upp á þjóðveginn og var fluttur með sjúkrabíl á sjúkrahúsið á Akranesi. Bíllinn var gjörónýtur og fauk brakið úr honum allt að kílómetra frá slysstaðnum og hafnaði ofan í fjöru.